Nostalji ki fé rékòt
Loulou koté Fòr Toulous
Larivyè Kousa avalé dé fòr françé lontem pasé. Piti françé é zalibamon té konnin jwé ensenm ent Fòr Toulous é Pakana. Yé té parlé dé langaj, osit! Yé té konnin shèrshé loulou dan dolo pi prenn dèriyè ènn-a-lòt. Kofè? Abin, pou gañin: yé té gin fé filan loulou toushé lapo. Yê paren-yé té gaddé de lwin. Piti-layé té kashé enba bransh-yé o té akroupi dèriyè zérons. Kan in piti sé réyisi mét filan sî in lòt, paren-layé sé tendé kri: “Non! Vilin! M’a aranjé twa!” Lá, yé té jish bòs rir.
Dépi komensmen-la, Françé-layé t’olé fé lamiché avèk Zalibamon pou fé zafè é shanjé lapo shévrœy. Zalibamon-layé t’olé chombo lapé dan réjyon avèk yê nouvo padna. Dan tem-çála, navé pa bariyè ki kontrolé nivo dolo dan larivyè. Toulédé Françé é Zalibamon té konnin fé rékòt laba paski latè-la té rish rish. Kèk sézon rékòt té pasé, pi apré lagè kont Françé é Indyin-la, Françé é Zalibamon-layé té kité yê patri pou kouri dan ça nouzòt pélé léta Lalwizyàn astè, lá. Omwin çé ça yé di.
Ça fé pliské 200 lannin dan pasé, byin avan diméro kalimason kòrn té diminnwé. Lá, avèk bariyè ki fé shanjé nivo dolo dan Kousa-la, ti loulou-çayé té gin dévlopé… É yé té fé ça. Yé té grosi pli gran ké néléfan – pròsh tay balènn blé! Pi yé grosí gran bwa enho yê latét, paréy ça shévrœy gin! Ça senm yê lavnir sa klè: okin traka ka fé yê pè. Konm tétay jéyan, yé glisé dan dolo, kité filan tou partou. Çé fou, hin? N’a trouvé moun ki protéjé tou yé paski moun pa ka iñoré ça yé, yé mét en danjé.
‘Lil Bug At Fort Toulouse
A long time ago, the Coosa River swallowed up two French forts. French and Alibamu kids used to play together between Fort Toulouse and Pakana. And they were bilingual! They used to catch bugs in the water then chase after one another. Why? Well, to win: they had make bug slime touch skin. Their parents watched from afar. The kids hid under branches or crouch down behind bushes. When one kid would successfully smear slime on another one, the parents would hear cries of “No! I’ma get you back!” Then, they’d just bust out laughin’.
Since the start, the French wanted to make friends with the Alibamu for business and deerskin trading. The Alibamu wanted to keep the peace in the region with their new allies. During those times, there weren’t any barriers or dams to control the water level in the river. Both the French and the Alibamu used to harvest crops there because the earth was rich in nutrients. Some harvest seasons passed, then after the French and Indian War, the French and the Alibamu left their homes for what we now call the state of Louisiana. At least that’s what they say.
That’s more than 200 years ago, well before the number of hornsnails got critically low. Now, with dams that change the water level in the Coosa, those ‘lil bugs had to evolve… And that’s what they did. They grew larger than elephants – approaching the size of a blue whale! Then they grew huge antlers from their head, like what deer have! Seems like their future will be clear: no trouble, no fear. As giant monsters, they glide in the water, leaving slime everywhere they go. It’s crazy, huh? Now we’ll find people playing protector because it’s impossible to just ignore what they put in danger.
Çé sèlmen posib fé kopi apré tèks é pòrtré si lartis-la donné pèmisyon ékri.
No text or images from this site may be reproduced without express written permission of the artist.